Қызылорда қаласының шетіндегі "мемлекет мұқтаждығына қажет" деп танылған Үмітгүл Әлмағамбетованың үйін сүру кейінге қалды деп хабарлайды Азаттық тілшісі.
Қызылорда облыстық сот актілерін орындау департаментінің басшысы Ақәділ Махамбетовтің айтуынша, әкімдік қазір Әлмағамбетоваға уақытша баспана қарастырып жатыр. "Әкімдік уақытша бір үй тауып бергенше Әлмағамбетованың үйі сүрілмейді" деді ол.
Қала шетіндегі бұрынғы "Дачный" деп аталатын аймақта орналасқан зейнеткердің үйін сот "Батыс Еуропа - Батыс Қытай күрежолы салынатын аумақта орналасқандықтан ешқандай өтемақысыз мемлекетке қайтарылуы тиіс" деген шешім шығарған. Жергілікті билік орындары "баспана заңсыз салынғандықтан үйді ешқандай өтемақы төлемей сүру заңды" дейді.
Сот орындаушылар үйді бұзуға бұған дейін бірнеше рет келген. Бірақ оған үй иесі мен көрші-қолаңдар қарсылық танытып, үйді бұзу кейінге қалдырылып келген.
Әлмағамбетованың айтуынша, әкімдік бұған дейін өзіне жер беруге уәде берген. "Бірақ бізге жердің құжатын әлі берген жоқ" дейді ол.
Әлмағамбетованың адвокаты Мұхамедқали Мадияров сот шешімімен келіспейтіндерін айтады.
