Польшада орналасқан үкіметтік емес Open Dialog ұйымы Украина билігін қазақстандық блогер Жанар Ахметті қамаудан босатуға және оны Қазақстанға экстрадицияламауға шақырды. Құқық қорғау ұйымы 25 қазанда жариялаған мәлімдемесінде Жанар Ахметтің өзіне босқын мәртебесін беруден бас тарту шешіміне апелляциялық шағым түсіретіні айтылған.
"Жанар Ахметтің ісінің саяси астары бар. Босқындар мәртебесі туралы конвенция мен Тұтқындарды қайтару туралы Еуропа конвенциясы тұтқынды егер оған тағылған айыптың саяси себебі болса экстрадициялауға тыйым салады" делінген мәлімдемеде.
Open Dialog сонымен қатар Еуропа парламентін, Еуропа кеңесінің парламенттік ассамблеясын, ЕҚЫҰ парламенттік ассамблеясын, БҰҰ мен демократиялық мемлекеттер үкіметтерін Украина билігіне "авторитарлық мемлекеттер биліктерінің саяси бәсекелестерін қудалауында ынтымақтастық орнатуын доғаруына ықпал етуге" шақырады.
Қазақстан билігін сынап жүрген блогер Жанар Ахмет 21 қазанда Киев түбінде ұсталған. Киево-Святощинский соты 24 қазанда оны 18 күнге қамауға алған. Жанар Ахметтің адвокаты Владислав Грищенко сот шешімі шыққан соң журналистерге блогердің аштық жариялағанын хабарлаған. Қорғаушылар сот шешіміне шағымданбақ ниетте.
Қазақстанда Жанар Ахмет "2005 жылдың наурызынан 2008 жылдың қазанына дейін жасаған алаяқтық әрекеттері үшін" сотталған. 2010 жылы тамызда Қазақстан соты Жанар Ахметтің жазасын өтеу мерзімін ұлы 14 жасқа толатын 2021 жылдың 5 қарашасына дейінгі мерзімге шегерген. Қазақстан билігі Жанар Ахметке ол жас баласымен Қазақстаннан Украинаға кетіп қалған соң іздеу жариялаған. Ол Қазақстанан кетіп қалу себебін елінде "саяси қуғын көруімен" байланыстырады.
