Нұр-Сұлтан қаласы "қызыл аймақтан" шықты
Коронавируспен күрес жөніндегі ведомствоаралық комиссия өкілдері ел астанасы Нұр-Сұлтан қаласының "қызыл аймақтан" шыққанын хабарлады. Қазір "қызыл аймақта" Ақмола мен Павлодар облысы қалған. "Сары аймақта" Нұр-Сұлтан қаласы, Солтүстік Қазақстан, Батыс Қазақстан және Қостанай облысы тұр. Қалғаны - "жасыл аймақта".
Қазақстанда кейінгі кезде күніне 1000-1200 аралығында науқас тіркеліп жүр. 2020 жылдың наурыз айынан бері 199 мыңнан астам адамның коронавирус тесті оң шыққан. 1 тамыздан бері 48 мың адамға коронавирус пневмониясы диагнозы қойылған. Індет басталғалы бері 3200-ден астам қайтыс болған.
Қазақстанда тағы 1 059 адамнан коронавирус пен пневмония анықталды, 9 адам өлімі тіркелді
Қазақстанда тағы 1 007 адамға коронавирус жұққаны тестпен расталды. 52 адамға коронавирус диагнозы қойылды. Денсаулық сақтау министрлігінің 11 ақпан күнгі хабарламасында осындай мәлімет көрсетілген. Бір күнде 9 адам өлімі тіркелген: 5 адам - коронавирустан, 4 адам коронавирус пневмониясынан қайтыс болған деп айтылады.
Ресми мәлімет бойынша, 2020 жылдың наурыз айынан бері коронавирус жұқтырғандар 199 093 адамға жетті. 180 807-і жазылған. Өткен тәулікте 1530 адам айыққан. 2020 жылдың наурыз айынан бері 2 626 адам қайтыс болған.
Қазақстан билігі 2020 жылдың 1 тамызынан бері пневмонияның коронавирусқа ұқсас түріне жеке код беріп, бөлек есептеп келеді. Содан бері 48 440 адамнан коронавирус пневмониясы анықталған. 591 адам қайтыс болған. 38 237 адам жазылған.
Қазір коронавирустан 25 272 адам емделіп жатыр. (9 612-ісінің ПТР тесті теріс шыққан, 15 660 адамның ПТР тесті оң шыққан). 5 318 науқас стационарда емделіп жатыр. 260 адамның жағдайы ауыр, 48 науқастың жағдайы өте ауыр. 46 адам жасанды тыныс аппаратына қосылған.
10 ақпан күнгі ақпарат бойынша, екі облыс пен бір қала – "қызыл аймақта" (Нұр-Сұлтан, Павлодар және Ақмола облысы). Қостанай, Солтүстік Қазақстан және Батыс Қазақстан облысы – "сары аймақта". Қалғаны – "жасыл аймақта".
Джонс Хопкинс университетінің мәліметі бойынша, әлемде коронавирус жұқтырғандар 107 млн 297 мыңнан асты. 59 млн 986 мың адам жазылған. 2 млн 352 мың науқас қайтыс болған.
ПТР тесті оң шыққан тағы 1 007 адам тіркелді
10 ақпанда Қазақстанда тағы 1 007 адамның ПТР тесті оң шыққаны хабарланды. Павлодар облысында 180 адамнан коронавирус анықталған.
Жалпы облыстар мен қалалардағы жағдай төмендегідей:
Нұр-Сұлтан - 23 482 (+131 адам жаңадан қосылды)
Алматы қаласында - 23 202 (+95),
Шығыс Қазақстан облысында - 20 944 (+75),
Атырау облысында - 16 562 (+21),
Қарағанды облысында - 14 521 (+66),
Павлодар облысында - 15 787 (+180),
Батыс Қазақстан облысында - 11 872 (+87),
Солтүстік Қазақстан облысында - 11 633 (+65),
Қостанай облысында - 11 131 (+78),
Ақмола облысында - 12 350 (+87),
Алматы облысында - 9 878 (+48),
Шымкент қаласында - 5 975 (+20),
Жамбыл облысында - 5 709 (+18),
Маңғыстау облысында - 4 135 (+7),
Түркістан облысында - 4 194 (+12),
Ақтөбе облысында - 4 043 (+8),
Қызылорда облысында - 3 675 (+9).
2020 жылдың наурыз айынан бері коронавирус жұққаны тестпен расталған науқастар 199 093 адамға жеткен.
Қазақстандық коронавирусқа қарсы вакцинаға 31 млрд теңге жұмсалады
Қазақстанда әзірленіп жатқан коронавирусқа қарсы вакцинаны өндіруге бюджеттен 31 млрд теңге бөлінеді. Бұл 15,6 млн адамды вакцинациядан өткізуге мүмкіндік береді. Бұл туралы 10 ақпан күнгі брифинг кезінде денсаулық сақтау министрлігі өкілдері хабарлады.
Бұған дейін коронавирусқа қарсы ресейлік "Спутник V" вакцинасын өндіруге бюджеттен 16,8 млрд теңге жұмсалатыны хабарланған еді. Ресейлік вакцинаның бір бөлігі - Ресейдің өзінде, бір бөлігі Қарағандыдағы фармацевтикалық кешенде өндіріледі. 10 ақпан күнгі брифинг кезінде журналистер 16,8 млрд теңгенің қаншасы Қарағандыдағы фармацевтикалық кешенге бөлінеді деген сұрақ қойды.
- Қазір Қарағандыда өндіретін вакцинаның бағасы келісім-шарт отырғызылған кезде белгілі болады. Қазір ұйымдастырылып жатыр, - деді денсаулық сақтау вице-министрі Ажар Ғинаят. Оның айтуынша, екі рет салынатын ресейлік коронавирусқа қарсы вакцинаның екі дозасының құны - 26 доллар.
Бұған дейін Қарағандыдағы фармацевтикалық кешенге елдегі ең ауқатты адамдардың бірі, экс-президенттің қызы Дариға Назарбаеваның құдасы Қайрат Боранбаев иелік ететіні белгілі болған.
ПІКІРЛЕР