Әкім сайлауы - 2021

Алматы облысында сайлаушыларға кандидаттың аты-жөні сызылған бюллетень берілді

Ауыл әкімін сайлау күні Алматы облысы Іле ауданы Чапаев селосында сайлаушыларға Жалпыұлттық социал-демократиялық партия атынан қатысқан кандидаттың аты-жөні сызылған бюллетень берілді. Онда кандидат Берік Қалижанұлы Ағыбаевтың аты-жөні сызылған, жанында "Ербол" деген жазу тұр. Комиссия мүшесінің түсіндіруінше, бұл кандидаттың аты-жөнін сызған адамның қолы. Бюллетень аймақтық комиссиядан осындай күйде келген.

Сайлау комиссиясының төрағасы "Берік Ағыбаев сайлаудан өзі бас тартты, бірақ не себепті екенін айту менің құзырымда емес" деді. Ал кейбір сайлаушылар оны сайлаудан шеттетті деп санайды.

- Қаншама уақыт дайындалған адам бас тарта салмайды ғой. Бір рет бағын сынап көруі керек еді. Ол бас тартпады, оған бас тартқызды. Басқа себебі жоқ, - дейді ауыл тұрғыны Нұрлан Бақтыбай.

Ал Салтанат есімді өзге тұрғын "Ағыбаев өз еркімен бас тартты" деген болжамға сенетінін жеткізді. Кейбір дауыс берушілер кандидаттың түсіп қалу себебі қызықтырмайды деп жауап берді.

Жалпыұлттық социал-демократиялық партиясының орталық аппарат басшысы Талғат Омаровтың айтуынша, Берік Ағыбаев денсаулығына байланысты сайлауға қатыса алмаған. Оның сөзіне қарағанда, ол 23 шілдеде кандидаттықтан бас тартқан.

Берік Ағыбаевтың өзінен жауап алу мүмкін болмады.

Талғат Омаровтың айтуынша, әкім сайлауына партия атынан 9 кандидат қатысып жатыр. Олар Алматы облысы, Батыс Қазақстан, Ақтөбе, Түркістан, Павлодар, Шығыс Қазақстан облыстарында тіркелген.

Қазақстанда ауыл әкімін тіке сайлау өтіп жатыр. 25 шілдеде Қазақстанның 14 облысында 1800-ден астам сайлау учаскесі ашылған. Сайлауға 2200-ден астам кандидат қатысып жатыр. 1400-ден астамы өз-өзін ұсынғандар.

Бұған дейін кейбір аймақта тәуелсіз кандидаттарды сайлауға жібермей жатқаны туралы хабар тараған.

Елена Швецова: Сайлау учаскесінде "Нұр Отан" партиясының үгіт-насихаты байқалды

Ақмола облысы Аршалы ауданы Ақбұлақ ауылындағы сайлау учаскесінде "Нұр Отан" партиясының лидері Нұрсұлтан Назарбаевтың суреті мен партия ақпараты ілінген. Бұл туралы сайлауға бақылаушы жіберіп отырған "Еркіндік қанаты" қоғамдық қорының атқарушы директоры Елена Швецова хабарлады.

Швецова Назарбаевтың суреті мен партия ақпаратын "Нұр Отанның" үгіт-насихатына балап отыр.

Сайлау учаскесінен түсірілген видеода қоғамдық қордың тағы бір бақылаушысы Дана Буралкиеваның да сөзі бар. Ол өзін бақылаушы ретінде таныстырған әйелдің сайлау учаскесі орналасқан мектептің қызметкері болып шыққанын айтады.

Қарағанды облысындағы ауылда сайлаушылар кандидаттардың бәрін бірдей танымайды

Қарағанды облысы Бұқар жырау ауданындағы екі сайлау учаскесінде Азаттық тілшісі Елена Вебердің дене қызуын өлшеп, қызметтік куәлігін көрсетуді сұраған. Бірақ кедергі жасалмаған. Бұл туралы журналистің өзі хабарлады.

"Журналиске сайлау комиссиясы мүшелерінен гөрі кандидаттардың сенімді өкілдері мен бақылаушылар көбірек қызығушылық танытты" дейді Азаттық тілшісі. "Жергілікті тұрғындар кандидаттардың бәрін бірдей танымайды. Ғабиден Мұстафин ауылындағы №513 сайлау учаскесінде сайлаушылар көп келіп жатыр. [Азаттық тілшісі] барып үлгерген сайлау учаскелерінде журналистің келгеніне тұрғындар да, комиссия мүшелері де таңданыс білдіріп жатыр".

Алматы облысында сайлауком төрайымы журналисті учаскеге жібермей қоймақ болды

Оқиға Іле ауданы Чапаев ауылындағы №415 сайлау учаскесінде болған. Учаскедегі сайлау комиссиясының төрайымы Жадыра Оқасова Азаттық тілшісі Манас Қайыртайұлының редтапсырмасын "мұқият" тексеріп, құжатта "нақты негіз жоқ" деді де, тілшінің учаскеден шығуын талап етті.

Алайда Оқасова осыдан кейін телефон арқылы біреумен сөйлесіп, журналиске учаскеден хабар таратуға рұқсат берді.

Чапаев ауылында үш сайлау учаскесі бар. Әкімдікке төрт адам таласып жатыр.

Азаттық тілшісі барған №415 сайлау учаскесінде 2100 сайлаушы бар. Учаске ашылғалы алғашқы екі сағаттың ішінде дауыс беруге бар болғаны 10 адам келген.