Орталық сайлау комиссиясының ақпараты бойынша, Нұр-Сұлтан уақытымен сағат 14.00-ке қарай Қазақстанда кезектен тыс президент сайлауына елде тіркелген сайлаушылардың 51,8 пайыздан астамы дауыс берген.
ОСК хабарлауынша, бұл көрсеткіш жағынан әзірге Ақтөбе облысы алда тұрса, Алматы сайлаушылары дауыс беруге енжар боп отыр:
Ақмола облысы - 56,7 %
Ақтөбе облысы - 69,4 %
Алматы облысы - 63 %
Атырау облысы - 45,4 %
Шығыс Қазақстан облысы - 59,8 %
Жамбыл облысы - 56,3 %
Батыс Қазақстан облысы - 40,9 %
Қарағанды облысы - 49,7 %
Қызылорда облысы - 63,1 %
Қостанай облысы - 55,8 %
Маңғыстау облысы - 52,4 %
Павлодар облысы - 45,9 %
Солтүстік Қазақстан облысы - 53,6 %
Түркістан облысы - 49,3 %
Нұр-Сұлтан қаласы - 37,6 %
Алматы қаласы - 37 %
Шымкент қаласы - 40,5 %
9 маусым күні таңертеңгі сағат 7:00-де елде 9 970 сайлау учаскесі ашылып, сайлаушылар кезектен тыс президент сайлауына дауыс бере бастаған. Шет елдерде 65 сайлау учаскесі жұмыс істеп жатыр.
Жексенбі күні Алматы, Нұр-Сұлтан және Шымкентте жаппай наразылық акциясына жиналған азаматтар әділ сайлау өткізуді талап етті. Кейбіреулер президент сайлауына бойкот жариялағандарын айтады. Аталған үш қалада да полиция азаматтарды жаппай ұстады.
Бұған дейін Қазақстан бас прокуратурасы маусымның 9-ы мен 10-ы күндері заңсыз митингіге шыққан азаматтардың жауапқа тартылатынын ескерткен. Оның алдында Қазақстанда сот "экстремистік ұйым" деп танып, тыйым салған "Қазақстанның демократиялық таңдауы" қозғалысын құрушылардың бірі, қазір шетелде тұратын Мұхтар Әблязов жақтастарын маусымның 9-ы күні Қазақстанның барлық аймағында билікке қарсы шеруге шығуға шақырған.
Маусымның 9-ы күні Нұр-Сұлтанда сағат 14:00 шамасында Жастар сарайы маңына наразылық білдіріп жиналған азаматтарды полиция ұстады. Билік өкілдері сол жерде хабар таратып жүрген Азаттық тілшісі Сәния Тойкенді де ұстап, автобусқа отырғызған. Оларды Есіл аудандық полиция бөлімшесіне жеткізген.
Сәния Тойкеннің хабарлауынша, жексенбіде түсте Жастар сарайы маңына жиналған жүз шақты азамат "әділетсіз сайлауға" қарсылық білдірген. Олар елде атом электр станциясын салмауды, Қытаймен қарым-қатынасты шектеуді талап еткен. Полиция оларды шетінен ұстап әкеткен. Әлеуметтік желіде оқиға орнынан түсірілген видеолар жарияланып жатыр. Онда қалқан көтеріп, арнайы киім киген жасақтың көшеде жүгіріп бара жатқаны көрінеді.
Маусымның 9-ы күні түстен кейін Алматы полициясы Азаттық тілшісі Петр Троценконы босатты. Содан бірнеше сағат бұрын полиция Астана алаңында Троценконы, сол сияқты AFP тілшісі Крис Риклтон, Vlast сайты қызметкері Катя Суворова және белсенді Димаш Әлжановты ұстап, полиция бөлімшесіне апарған. Белсенді Ирина Медникованың айтуынша, полицейлер Суворова мен Әлжановтың құрылғыларын тартып алған. Оларды қолдауға барған журналистер мен құқық қорғаушыларды полиция бөлімшесінен күштеп шығарып жіберген.
Жексенбі күні таңертең Қазақстанда кезектен тыс президент сайлауына дауыс беру басталған. Жұма күні Қазақстан бас прокуратурасы маусымның 9-ы мен 10-ы күндері заңсыз митингіге шыққан азаматтардың жауапқа тартылатынын ескерткен болатын. Оған дейін Қазақстанда сот "экстремистік ұйым" деп танып, тыйым салған "Қазақстанның демократиялық таңдауы" қозғалысын құрушылардың бірі, қазір шетелде тұратын Мұхтар Әблязов жақтастарын маусымның 9-ы күні Қазақстанның барлық аймағында билікке қарсы шеруге шығуға шақырған.
Жексенбі күні түстен кейін Алматының орталығындағы көшелердің бірін қоршаған полиция Панфилов көшесі бойында ерсілі-қарсылы жүрген азаматтарды ұстады. Азаттық тілшілері сол маңда толып жүрген полицияның бес-алты адамды қатты күш қолданып, көлікке отырғызғанына куә болды. Ұсталғандар арасында қазір сот шешімімен үйқамақта отырған көп балалы ана, белсенді Оксана Шевчуктің анасы да бар. Азаттыққа сұхбат бере салысымен оны полиция қызметкерлері алып кетті.
Полиция оқиғаға байланысты түсініктеме бермеді.
ПІКІРЛЕР