9 маусымда Шымкенттегі №148 сайлау учаскесінде дауыс берген сайлаушылардың кейбірі жұмыс орнында басшылықтың сайлауға дауыс бергенін дәлел сұрайтынын айтты. Өзін Шымкенттегі №1 қалалық емхананың аға мейірбикесі деп таныстырған Бағила Сарбасова Азаттық тілшісінен өзінің дауыс беріп жатқан сәтін смартфонына түсіруді өтінді.
"Бастығымыз фотоесеп бересіңдер деген соң түсіріп жатырмыз" деген ол:
- Есеп үшін жіберу керек. Бізге нақты кімге дауыс беруді айтқан жоқ. Бірақ бастығымыз ұжымнан кімдердің барғанын білгісі келеді, - деп түсіндірді Азаттық тілшісіне.
Бұған дейін әлеуметтік желіде кей азаматтардың "сайлау күні фотоесеп беру" жайлы міндеттелгені туралы ақпарат тараған.
Кезектен тыс президент сайлауына "Нұр Отан" партиясынан қатысып жатқан елдің қазіргі президенті Қасым-Жомарт Тоқаев маусымның 9-ы күні таңертең Нұр-Сұлтандағы "Астана Опера" театрында орналасқан сайлау учаскесіне келіп, сайлауға дауыс берді.
Азаттық тілшісі Аян Қалмұраттың хабарлауынша, Нұр-Сұлтан қаласындағы №83 және №143 сайлау учаскелеріне сайлауға дауыс беруге келген ондаған азамат сайлаушылар тізімінен өздерінің аты-жөнін таба алмаған. Ол осы сайлау учаскелеріне қарасты аумақта көп жылдан бері тұрып жатқанын айтады.
Алматы қаласындағы сайлау учаскесінде дауыс бергеннен кейін бұл туралы "есеп беру үшін" селфиге түскендер де кездесті.
ПІКІРЛЕР