Бауыржан Байбек Алматыда көп балалы отбасыларды қолдауға арналған "Бақытты отбасы" арнайы тұрғын үй бағдарламасы іске қосылады деп хабарлады.
"[Үйге] кезекте тұрған 1276 көп балалы және толық емес отбасының көбі тұрғын үйдің бастапқы жарнасын төлей алмайтындықтан қала бюджетінен 1 миллион теңгенің тұрғын үй сертификаттары беріледі. Бастапқы жарна пәтер құнының он пайызын құрайды, несие 2 пайыздық мөлшерлемемен 18 жылға беріледі" деді әкім. Байбек несие жаңадан салынған үйлердегі құны 15 миллион теңгеден аспайтын шағын пәтерлерге ғана берілетінін хабарлады.
Алматы тұрғындары әкімінен қала шетіндегі шағын аудандарды тұрақты автобус байланысымен қамтамасыз етуді сұрады. Жиында сөйлегендер тозығы жетіп, құлауға шақ тұрған үйлердің проблемасы, қала іргесіндегі ауылдардағы мектеп тапшылығы, инклюзивтік білім беру мәселесін қозғады. Байбек тұрғындар көтерген мәселелерді шешуді жиынға қатысып отырған қарамағындағы шенеуніктерге – қалалық басқармалар мен бөлімдер басшыларына тапсырды.
Есеп беру жиыны барысында Алматы әкімі Бауыржан Байбек Көкжайлау шатқалында құрылыс салуға қарсы азаматтарға алаңдаушылық білдіргендері үшін алғыс айтты. Әкімнің сөзінше, белсенділердің күш-жігерінің арқасында тау шаңғысы курортының жобасы едәуір қысқарып, салынатын құрылыс көлемі азайған.
Көкжайлау мен Құмбелдің көріністері
Ал "Көкжайлауды қорғайық!" тобының белсенділері шатқалда курорт мүлде салынбасын дейді. Сәрсенбі күні Алматы әкімінің есеп беру жиынына қатыспақшы болған осы топтың бірнеше белсендісін полиция ұстап әкеткен.
Алматыдағы жиында әкімге сұрақ қойған көп балалы ана болмашы табысқа қалай өмір сүруге болатынын сұрады. Тұрғын сауалына жақында үкімет жанынан халықтың тұрмысын жақсарту мақсатында құрылған арнайы жұмыс тобына жетекшілік ететін вице-премьер Ерболат Досаев жауап берді. Ол жұмыс тобы тұрғындардан түскен барлық арыз-өтініштерді саралап шыққан соң, екі айдың ішінде тиісті шешім қабылданады деп мәлімдеді.
Астанада 45 мың отбасы баспана кезегінде тұр (15 ақпан 2019 жыл):
Сәрсенбідегі жиында Алматы әкімі көп балалы аналардан түскен "конструктивтік ұсыныстардың ешбірі назардан тыс қалмайды" деп сендірген. Бауыржан Байбек соңғы екі аптада қала билігі ондаған кездесу өткізіп, жүздеген әйелден көп арыз-өтініш түскенін айтты. "Біздің жұмысшы топ оларды жинастырып, талдап, есептер жүргізді. Арасындағы ең өзектілері – баспана, коммуналдық төлемдер, жәрдемақыны көбейту, оқу және жұмысқа орналастыру мәселелеріне қатысты" деді әкімі. Оның сөзінше, жұмысшы тобы ұсыныстардың барлығын, солардың арасында адрестік әлеуметтік көмек методикасын өзгерту туралы ұсыныстарды да үкімет жанындағы жұмыс тобына жолдаған. "Қала деңгейінде баспана, жұмысқа орналастыру мен қайта даярлау, балабақша мен жергілікті бюджеттен төленетін бір жолғы төлем мөлшерін ұлғайтуға байланысты кешенді шаралар әзірленді" деді Байбек.
"Астана" концерт залындағы жиында өзін жалғызілікті анамын деп таныстырған тұрғын мемлекет тарапынан ешқандай қолдау көріп отырмағанын айтты. Бұған дейін Астанада көп балалы аналарға әлеуметтік жәрдемді күшейту талап еткен тұрғындар мен шенеуніктердің қатысуымен өткен бірнеше кездесуге қатысқан әйел баспана мәселесін көтеріп, қалада балаларға арналған үйірмелердің ақылы екенін айтты.
Астана әкімі тұрғынға әлеуметтік мәселелердің көбі лезде шешілмейді деп жауап берді. Шенеунік қалада балаларға арналған тегін үйірмелер бар деп сендірді. "Қажет болса балаңызды жетектеп апарамыз" деді ол.
Бұдан соң Бақыт Сұлтановтың есепті жиыны аяқталғаны және әкімнің түстен кейін азаматтарды қабылдайтыны хабарланды. Әкімге сұрақ қойып үлгермеген тұрғындар наразы болды.
ПІКІРЛЕР