Украина қорғаныс министрлігі соғыстың алғашқы төрт күні бес мыңнан аса ресейлік әскери қаза тапты деп мәлімдеді.
Facebook желісіне жарияланған ресми мәлімдемеде 5300 ресейлік әскери өліп, 191 танк, 29 әскери ұшақ, 29 тікұшақ, 816 бронетехника жойылды деп жазылған.
Украина тарабы таратқан статистиканы соғыс жағдайында тексеру мүмкін емес.
Ресей қорғаныс министрлігі 27 ақпанда алғаш рет соғыста әскерилері қаза болғанын мойындаған. Бірақ Мәскеу нақты қанша адам қаза тапқанын айтпады.
Украина президенті Владимир Зеленский телеүндеу жасап, Еуропа одағына қайырылды.
"Еуропа одағынан тез арада Украинаны ЕО құрамына қабылдау үшін жаңа арнайы процедураны көп созбай бастауды сұраймыз. Серіктестерімізге бізді қолдағанына алғыс айтамыз, бірақ біздің мақсат – еуропалықтармен бірге болу және бастысы – олармен тең болу. Осылайша әділдік орнайтынына сенемін. Бұлай жасау мүмкін екеніне де сенемін" деді ол.
Украина делегациясы Ресей билігі өкілдерімен кездесу үшін Украина-Беларусь шекарасына келді. Келіссөзде Украинадан Ресей әскерін жылдам шығару және атысты тоқтату талқыланбақ.
Вечерная Караганда: Қарағанды облысында интернет-провайдер Украинадағы соғысқа қарсылық ретінде Ресей каналдарын өшіріп тастады
"Құрметті абоненттер! Біз соғысқа және соғыс пропагандасына қарсымыз! Сол себепті біз "федералды" канал деп аталатын барлық Ресей арналарының орнына уақытша Хабар-24 арнасының эфирін береміз» деп келтіреді "Вечерная Караганда" газеті Шахтинскідегі Ремстройсервис дейтін теле және интернет-провайдердің хабарламасын келтіріп.
ПІКІРЛЕР