Қазірге дейін не белгілі?
Азаттықтың жазбаша трансляциясына енді ғана қосылсаңыз, Украинадағы соғыстың бесінші күні не болып жатқанын қысқаша шолып шығыңыз:
- Беларусьте Украина мен Ресей делегациясы арасында келіссөз басталды. Келіссөздегі талқы атысты тоқтатып, Ресей әскерін Украинадан шығару болмақ.
- Украина тарапы Ресей Харьков қаласына шабуылдап жатқанын, "ондаған адам қаза тауып, жүздеген адам жараланғанын" хабарлады.
- Украина президенті Владимир Зеленский Еуропа одағынан Украинаны осы одаққа қабылдау процесін бастауды сұрады. Бұған қоса, ол Ресей әскерилерін қаруларын тастап, Украинадан кетуге шақырды.
- Киевте бірнеше рет дабыл қағылды.
- Ресейге салынған санкциялардан соң бір доллардың құны 100 рубльден асып кетті. Қазақстанда бір доллар 495 теңге болды.
- Украина тарабы 5300 ресейлік әскери қаза тапты деп мәлімдеді. Мәскеу әскерилері қатарында қаза болғандар барын мойындағанымен, нақты санын жарияламай отыр.
- БҰҰ есебінше, соғыс басталғалы 495 мың украиналық көрші елдерге босып кеткен.
Харьковқа шабуыл жасалғаны хабарланды
Украина ішкі істер министрінің кеңесшісі Антон Геращенко Харьков қаласы "Град" реактивті жүйесінен атқылауға ұшырап жатыр деп мәлімдеді. "Ондаған адам қаза тауып, жүздеген адам жараланды" деп жазды ол.
Украинаның экс-инфраструктура министрі Владимир Емельян да твиттерде "Путин Харьковты "Градпен" атқылап жатыр" деп жазды.
Мәскеу-Киев келіссөзі алдында Украина президенті мәлімдеме жасады
"Біз Еуропалық одақтан Украинаны Еуроодаққа жаңа арнайы процедура бойынша дереу қабылдауды сұраймыз. Одақтастарға жанымызда болғаны үшін алғыс білдіреміз. Бірақ біздің мақсатымыз – барлық еуропалықпен бірге және олармен тең болу. Мен мұның әділ екеніне сенімдімін. Мен мұның мүмкін екеніне сенімдімін.
Зеленский ресейлік әскерилерге "Не үшін келдіңдер мұнда? Брондалған техникадан тұратын колонналарыңыз неліктен біздің Қырымнан өзімізге шабуыл жасайды?... Техникаларыңды қалдырып, кетіңдер. Командирлеріңе сенбеңдер. Пропагандашыларыңызға сенбеңіздер. Кетіңдер" деді.
Украинамен келіссөз жүргізуге келген Ресей делегациясының құрамы белгілі болды:
- Ресей президентінің көмекшісі Владимир Мединский
- Ресейдің Беларусьтегі елшісі Борис Грызлов
- Депутат Леонид Слуцкий
- Ресей сыртқы істер министрінің орынбасары Андрей Руденко
- Ресей қорғаныс министрінің орынбасары Александр Фомин
Делегацияны Мединский басқарады
ПІКІРЛЕР