Алматыда Ресей консулдығы алдына келіп, Украинаға қолдау білдірген азаматтарды ұстап әкетті
Соның алдында он шақты адам консулдық алдына келіп, "Украинадан қолыңды тарт" деп ұрандатты. Акция қатысушылары Украина туын және ұран жазылған плакат ұстап тұрды. Азаттық жиыннан тікелей эфирге шықты.
Латвия өз аумағында Ресей телеарналарының трансляциясына тыйым салды
Елдің электронды бұқаралық ақпарат құралдары жөніндегі ұлттық кеңесі "Россия" телеарнасының көрсетілуін бес жылға, "Россия 24" телеарнасының көрсетілуін төрт жылға, TV Centr International арнасының көрсетілуін үш жылға тыйды.
Еуроодақ басшылығы Ресейді бұрын-соңды болмаған деңгейде оқшаулауға уәде берді
Еуропа комиссиясының басшысы Урсула фон дер Ляйен мен Еуродақтың сыртқы саясат және қауіпсіздік саясаты жөніндегі өкілі Жозеп Боррель Еуроодақтың Мәскеуге қарсы ауыр санкция салатынын мәлімдеді.
"Ресей бұрын-соңды болмаған деңгейде оқшауланады" деді Жозеп Боррель.
Ал Урсула фон дер Ляйен "Украина жеңеді" деді.
Қалетаев: Украинадағы қазақстандықтарды Шығыс Еуропа арқылы эвакуациялау жоспары бар
Қазақстанның Украинадағы төтенше және өкілетті елшісі Дархан Қалетаев Азаттық тілшісіне қазақстандықтарды эвакуациялау жолдары туралы айтты. Оның сөзіне қарағанда, Украинаның әуе кеңістігі жабық, сондықтан елшілік басқа жолды қарастырып жатыр.
- Әуежай іздеп жатырмыз. Қай жерге Air Astana'ның ұшағы қонатын мүмкіндік барын анықтау керек. Беларусьпен шекара жабық. Молдоваға автокөлік жолы Одесса арқылы баратындықтан қауіпті. Ол жерлерде соғыс болып жатыр. Ең қауіпсізі Львов қаласы, азаматтарға сол жаққа баруды ұсынып жатырмыз. Ары қарай Польша не Венгрияға шығаруға тырысамыз. Азаматтардың Еуропа елдеріне визасы жоқ, сондықтан қай мемлекет бізге жасыл коридор бере алатынына байланысты. Әзірге жоспар осындай, – деді елші.
Елшінің сөзінше, Киев көшелерінде кептеліс, тұрғындарда дүрлігу бар. Соған қарамастан елшілік жұмыс істеп тұр. Қазір елшілік ғимаратында Қазақстанның 30 шақты азаматы бар. Украинадағы Қазақстан елшілігінің мәліметінше, 2 мыңдай азамат консулдық тіркеуде тұр.
ПІКІРЛЕР