Reuters агенттігі 150 әскери техника тұрғаны байқалатын спутниктен түсірілген суреттерді жариялады. Олар Украинамен 32 шақырым жерде – Беларусьтің оңтүстігіндегі Мозырь және Хойники елді мекендеріне жақын жерде тұр деп айтылады.
Украина ақпарат құралдарының жазуынша, Киевтен 30 шақырым жердегі Васильков қаласына Ресей десанттары түскен. Шайқас жалғасып жатыр.
Украина билігі Киевтегі Победа даңғылында әскери бөлімге шабуыл жасаған қарсылас тарапқа тойтарыс берілгенін хабарлады. Киевтің өзге аудандарында да жарылыс пен атыс болып жатқаны хабарланды.
Киевтің түрлі аудандарында шайқас жалғасып жатыр. "Украинская правда" басылымы жариялаған видеода автоматтар дыбысы естіледі. Видео Киев орталығындағы Богдан Хмельницкий көшесінде түсірілген деп айтылады.
Украинаның көптеген қалаларында сирена ойнатылды.
Түрлі арналар мен басылымдар 26 ақпан таңертең Украинаның көптеген қалаларында сирена ойнатылғанын хабарлады: шығыста – Харьков, орталықта – Винница мен Умань, батыста Луцк мен Львов және өзге өңірлер.
ПІКІРЛЕР