Украина қарулы күштерінің бас штабы соғыс басталғалы Ресей 17 мыңнан аса әскериін жоғалтты (жараланғандар мен қаза болғандар) деп мәлімдеді.
Бұдан бөлек Украина Ресей мынандай шығынға ұшырады деп отыр:
- 614 танк
- 1735 бронетехника
- 311 артиллериялық жүйе
- 96 ракета ататын әскери көлік
- 54 әскери дрондарға қарсы жүйе
- 135 ұшақ
- 131 тікұшақ
- 1201 әскери көлік
- 7 кеме/катер
- 75 цистерна
- 8 әскери дрон
- 22 арнайы техника
- 4 кіші қашықтыққа ұшатын баллистикалық ракета.
Бұл – Украина тарабының ғана дерегі. Соғыс уақытында мұндай мәлімдемелерді тәуелсіз дереккөз арқылы тексеру қиын.
"Ресей әскері артқа шегініп жатқан жоқ, олар қайта ұйымдасуға тырысып жатыр" деп мәлімдеді НАТО басшысы Йенс Столтенберг Брюссельде журналистермен тілдескенде.
"Ресей әскерилері қайта ұйымдасуға, қару-жарақтарын толтыруға тырысып жатыр, осылайша олар Донбасс аймағына шабуылды күшейтпек" деді ол.
Украина қорғаныс министрлігі де бүгінгі мәлімдемесінде қазір Ресей күштері Донецк пен Луганск облысына толық бақылау орнатуға күш салып жатыр деп мәлімдеді.
Ресей президенті Владимир Путин "дос емес елдерге" газды рубльде сату туралы жарлыққа қол қойды. Путин егер Еуропа елдері газды сатып алғанда рубльмен төлемесе келісім-шартты үземіз деп мәлімдеді.
Бұған дейін Франция мен Германия Ресеймен газ алғанда рубльмен төлемейтінін айтқан.
Украинаның адам құқығы жөніндегі уәкілі Людмила Денисова Euronews арнасына берген сұхбатында "соғыс басталғалы Ресей Украинадан күштеп 400 мыңдай адамды шығарды" деп мәлімдеді.
"Біздің азаматтар Украинадан еркінен тыс Ресейге жіберілді. Олар өз еркімен кеткен жоқ. Оларды алдымен Донетчиндегі фильтрациялық лагерьге алып барды, ары Ресейге әкетті. Одан соң Ресейдің Сахалин сияқты тұрмысы төмен аймақтарға пойызбен жеткізді" деді ол.
Соғыс уақытында мұндай ақпаратты тәуелсіз дереккөздер арқылы тексеру мүмкін емес.
ПІКІРЛЕР