The Insider журналисі Оксана Баулина Киевте оққа ұшты
The Insider басылымының тілшісі Оксана Баулина Киевте редакция тапсырмасын орындап жүрген кезде оққа ұшып, қаза тапты.
"Ол Ресей бомбалап жатқан Киевтің Подольск ауданын суретке түсіріп жүрген кезде жаңа зымыранның бомбалауының астында қалды. Онымен бірге бір бейбіт тұрғын қаза тапты. Оларды ертіп жүрген екі адам жараланып, ауруханаға түсті" деп жазады The Insider.
Оксана Баулина бұған дейін Алексей Навальный негізін қалаған Жемқорлықпен күрес қорында жұмыс істеген. Азаттықтың Орыс қызметінде және "Медиазонада" тілші болған.
2017 жылы Азаттықтың Орыс қызметі Оксана Баулина жайында деректі фильм түсірген. Ол кезде Оксана "Навальный Live" каналында бас редактор қызметін атқарған. Каналды Ресей билігі экстремистік ұйымдардың тізіміне енгізгеннен кейін Баулина Ресейден кетуге мәжбүр болған.
Ұлыбритания Украинаға 6 мыңнан астам зымыран береді
Ұлыбритания премьер-министрі Борис Джонсон 23 наурызда Украинаға 6 мыңнан астам зымыран жіберетінін, оған қоса 33 млн доллар көлемінде қаржылай көмек көрсететінін мәлімдеді. НАТО мен "Үлкен жетіліктің" Брюссельдегі саммиті қарсаңында Джонсон Украинаға жіберетін зымырандардың арасында танк шабуылдарына төтеп беретін және бомбалайтын зымырандар барын айтты.
"Ұлыбритания одақтастарымен бірге Украинаның қорғанысын нығайтып, әскери және экономикалық тұрғыда қолдау мәселесін қарастырады. Ресей Украина қалалары мен елді мекендерін қиратып жатқанда қол қусырып отыра алмаймыз" деп жазылған мәлімдемеде.
Премьер-министр кеңсесінің мәліметіне қарағанда, Джонсон Брюссельдегі саммитте одақтастарын Мәскеу әрекетіне ширақ жауап беруге үндейді.
Ресей президентінің тұрақты даму үшін халықаралық байланыстар жүргізу бойынша арнайы өкілі Анатолий Чубайс қызметінен бас тартып, Ресейден кетіп қалған. Бұл туралы тәуелсіз дереккөздеріне сілтеме жасап, Bloomberg сайты хабарлады. Дереккөздер "Чубайс Ресейдегі соғысты қолдамайтындықтан елден кетті" деген.
Журналистер Шойгудың 12 күннен бері көрінбей кеткенін байқаған
Журналистер Ресей қорғаныс министрі Сергей Шойгудың 12 күннен бері жұрт көзіне көрінбей кеткенін аңғарған. Бұған алдымен "Медиазона" журналисі Дмитрий Трещанин назар аударды.
Осыдан соң "Агентство" сайты Шойгуды "іздеп", оның ресейлік ақпарат агенттіктерінде соңғы рет 11 наурызда шыққанын жазды. Осы күні Шойгу Түркия сыртқы істер министрі Зулуси Акмармен сөйлескен және әскери госпитальға барып, Украинадағы қақтығыста жараланғандарға наградалар тапсырған еді.
18 наурызда Кремль сайты Шойгудың Путин өткізген Қауіпсіздік кеңесінің жиынына қатысқанын жазды, бірақ жиыннан сурет я видео жарияланбады. Осы күні "Первый каналда" Шойгудың жараланғандарға награда тапсырғаны жайлы сюжет шыққан, бірақ видео кадрлары 11 наурыздағы видеомен сәйкес келеді.
11 наурыздан бастап Шойгу мен Ресей қарулы күштері бас штабының басшысы қатысқан жиындар жайлы хабарланбады.
ПІКІРЛЕР