Financial Times: Украина мен Ресей келіссөзінде айтарлықтай алға жылжу бар
Екі тарап атысты тоқтатып, Ресей әскерінің Украинадан шығару мәселесін қарастыратын 15 пунктен құралған келісімді талқылап жатыр. Бұл туралы келіссөзге қатысы бар үш дереккөзіне сілтеме жасаған Financial Times басылымы хабарлады.
Келіссөздің жалпы мағынасы мынандай: Украина НАТО-ға мүше болу жоспарынан бас тартады және өз аумағында шетелдік әскери база орнатпайды. Ал Ресей Украинаның қауіпсіздігіне кепілдік береді; АҚШ, Ұлыбринатия және Түркия Украинаның қауіпсіздігіне гарант болады.
Бұған дейін Украина президенті Зеленский келіссөздегі позициялардың ұстанымдары "ақылға қонымды бола бастады" деген. Ал Ресей сыртқы істер министрі Сергей Лавров келісімге келуге жақын нақты тұжырымдар бар деп мәлімдеді.
НАТО-ның ресми өкілдері Путиннің әскері қазірге дейін Украинадағы мақсатына жеткен жоқ және «алда да жете алмауы мүмкін» деп мәлімдеді. Бұл туралы ВВС хабарлады.
НАТО өкілдері Ресей әскерилері мақсаттарына жетуі қиындаса да, Украинаға әлі де көп зиян шектіретін күшке ие деп отыр. Альянстың әскери қызметкерлері "Ресей Донецк пен Луганск облыстарында біраз мақсаттарына жеткенімен, Киевті қоршай алмай жатыр, Одессаға басып кіру мақсаты да сәтсіздікке ұшырады" дейді.
Владимир Путин министрлермен жиын өткізді. Ол алғашқы 20 минутта Ресейдің Украинадағы "арнайы операциясы" (Кремль Украинадағы соғысты осылай атайды) жайлы сөз қозғады.
Путиннің сөзінше, "арнайы операция жоспар бойынша жүріп жатыр", Ресейдің Украинаны оккупациялау жоспары жоқ, Батыс Украинаны қантөгісті жалғастыруға итермелеп отыр, Еуропада орыстарға шүйлігіп жатыр.
Путин ең төменгі жалақы мөлшері, күнкөріс минимумы, бюджет қызметкерлерінің жалақысы, зейнетақы, әлеуметтік төлемдер өсетінін жариялады. Ол Ресейде қалған шетелдік компанияларға "қосымша мүмкіндіктер берілетінін" айтты.
Зеленский АҚШ Конгресінде: Бізге ұшақ керек
Украина президенті Владимир Зеленский АҚШ Конгресінде сөз сөйлеп, Вашингтонды Ресей соғысты қаржыландыра алмас үшін санкцияны күшейтуге шақырды.
Ол Украинаның аспанын "жабуды" және еліне авиация мен зениттік ракета жүйелерін беруді де сұрады.
"Біз көп нәрсе сұрап отырған жоқпыз. Ресейге біздің қалаларымызға террорлық шабуыл жасатпауымыз керек. Бұл өтінішімізді орындау қиын болса, альтернатива ұсынайын: бізге С-300 сияқты қорғаныс құралдары керегін білесіздер. Мықты авиация халқымызды, бостандығымызды, жерімізді қорғауға мүмкіндік береді. Ұшақтар Украинаны және Еуропаны қорғауға көмектеседі. Сіздерде ұшақ бар, бірақ олар Украина аспанында емес жерде тұр" деді Зеленский.
ПІКІРЛЕР