АҚШ барлау қызметі: Украинамен соғыста Ресейдің 7 мың әскері опат болды
"Украинадағы соғыс басталғалы 20 күннің ішінде Ресей жеті мыңнан аса әскериінен айырылды" деп жазды The New York Times америкалық барлау қызметінің дерегін сүйеніп. Бұл – Ирак пен Ауғанстандағы 20 жылға созылған соғыста қаза болған америкалық солдаттардан көп.
Газет 14 мыңнан 21 мыңға жуық ресейлік әскери жарақаттанған деп жазды. Басылымның ақпараты бойынша, Украинадағы соғысқа Ресейден 150 мыңнан аса әскери қатысып жатыр.
The New York Times дереккөздері қаза болғандар жайлы дерек БАҚ-тағы деректер, спутник суреттері, ресейлік техника мен әскерилердің фотолары және екі тараптың ресми мәліметтеріне сүйеніп жасалғанын айтқан.
Сарапшылар Украина тарабы қаза тапқан ресейліктердің санын өсіріп көрсетуі мүмкін, ал Ресей нақты статистиканы жасыруы мүмкін деп санайды.
Ресей қорғаныс министрлігі соғыс басталғалы қаза тапқандар жайлы статистиканы бір рет ғана жариялаған. 2 наурызда Ресей қорғаныс министрлігі Украинада 498 әскериі қаза болып, 1597 әскериі жараланғанын айтқан.
Ал Украина тарабы Ресей 13,8 мың әскериінен айырылды (қаза болғандар мен жараланғандар) дейді.
Украина билігі соғыста Ресейдің төрт генералы қаза болды деп те мәлімдеген. Ресей бұл ақпаратты растамады.
The New York Times дереккөздері ресейлік генералдар қорғалмаған телефон байланыстарымен және рациялармен байланысып жатқанын айтады. "Украина тарабы кемі бір генералдың телефон қоңырауынан оның қайда екенін анықтап, өлтірген" дейді басылым дереккөзі.
Соғыс уақытында бұл деректерді тәуелсіз дереккөздер арқылы тексеру мүмкін емес.
Өзбекстан СІМ: "Луганск және Донецк республикаларын" мойындамаймыз
Өзбекстан сыртқы істер министрі Абдулазиз Камилов сенат отырысында Украинадағы жағдай бойынша сұрақтарға жауап берді. Оның айтуынша, Өзбекстан Украинадағы жағдайға алаңдайды және мәселенің бейбіт түрде шешілгенін қалайды. Ол Ташкент екі елмен қарым-қатынасты жалғастыра беретінін айтты.
Абдулазиз Камилов сөз арасында Украинадағы қиын жағдайды ескере отырып, Ташкент Киевке тағы гуманитарлық көмек жіберетінін айтты.
Бұған дейін Украинаның Ташкенттегі елшісі Микола Дорошенко Киевке 28 тонна гуманитарлық көмек бергені үшін Өзбекстанға алғыс білдірген.
Камилов сенат отырысы кезінде Өзбекстан Украина шығысындағы сепаратистік құрылымдарды атап айтқанда, "Луганск және Донецк халық республикаларын" мойындамайтынын мәлімдеді.
"Өзбекстан Украинаның тәуелсіздігін, егемендігі мен территориялық тұтастығын мойындайды. Луганск және Донецк халық республикаларын мойындамаймыз" деді сыртқы істер министрі.
Сыртқы саясат концепциясына сүйенген министр Өзбекстан ешқандай әскери-саяси блоктарға қатыспайды және әскерін де шетелдегі қақтығыстарға жібермейді дейді.
Оның айтуынша, Украинаға басып кіргені үшін Мәскеуге салынған санкция Өзбекстанға тікелей әсер етіп отыр. Ташкент оның кері әсерін жоюға күш салады.
24 ақпанда Ресей президенті Владимир Путин Украинаны "денацификация және демилитаризациялау" мақсатында көрші елге басып кірген. Путин НАТО Украинаны Ресейге қарсы шепке айналдырғысы келеді деп мәлімдеген. Украина мен НАТО мұны жоққа шығарады.
Смартфон чиптерінің ірі өндірушісі саналатын Qualcomm компаниясы Украинадағы басқыншылық соғысы үшін Ресейдегі саудасын тоқтатанын мәлімдеді
Бұл туралы Twitter-де компанияның мемлекеттік органдармен жұмыс істеу жөніндегі вице-президенті Нейт Тиббитс айтты.
"Біз АҚШ санкциялары мен заңдарын ұстанамыз, сол себепті Ресей компанияларына өнім сатпаймыз" деп жауап берді ол Украина цифрлық трансформация министрі Михаил Федеровтың сыни сөзіне жауап беріп.
Тиббитс сондай-ақ Qualcomm компаниясының Украинадағы соғыстан зардап шеккендерге көмектесетін қайырымдылық қорларына үлес қосып жатқанын айтты.
АҚШ Ресей элитасының Батыстағы мүлкін тауып, оны бұғаттау жөнінде халықаралық топ құрды. Топқа Австралия, Ұлыбритания, Канада, Жапония, Германия, Франция, Италия және Еурокомиссия өкілдері кірді. Бұл туралы АҚШ қаржы министрлігі хабарлады.
АҚШ қаржы министрі Джэнет Йеллен пен АҚШ бас прокуроры Меррик Гарланд сәрсенбі, 16 наурыз күні қатысушы елдердің өкілдерімен виртуалды кездесу өткізді.
"Кейінгі үш аптаның өзінде АҚШ құқық қорғау органдарының шетелдегі әріптестерге берген ақпараты санкцияға ілінген адамдардың не заңды тұлғалардың бақылауындағы бірқатар кемені ұстауға мүмкіндік берді" деп мәлімдеді қаржы министрлігі.
ПІКІРЛЕР