"ОВД-Инфо" мәліметінше, соғысқа қарсы акцияларда ұсталғандар 400-ден асқан. Жексенбі күні мұндай шара Ресейдің 30 қаласында өткен. 24 ақпаннан бері соғысты тоқтатуды талап еткен акцияларда 14,4 мың адам ұсталған.
Ресейде соғысқа қарсы акциялар өтіп жатыр. Хабаровск, Омбы, Иркутск, Владивосток, Екатеринбург қалаларында ұстаулар болған. "Украина, ты права" (Украина, сенікі дұрыс), "Нет войне!" (Соғыс болмасын!) деген жазуы бар плакат көтерген адамдар ұсталған.
"ОВД-Инфо" мәліметінше, ұсталғандар жүзден асқан. Екатеринбургте 24 адам полицияға жеткізілген.
Польшаға жақын әскери полигонды атқылау кезінде қаза болғандар көбейді
Соңғы мәлімет бойынша, шабуылдың салдарынан 35 адам қаза болған. 134 адам жараланған.
Бұған дейін Львов облысының билігі Яворов полигонына қарай шамамен 30 зымыран ұшырылды деп мәлімдеген. Кейбірін украин жағы атып түсірген.
НАТО: Ресей химиялық қару қолданатын операция жоспарлауы мүмкін
Ресей Украина аумағында химиялық қару қолданатын операция жоспарлауы мүмкін. Немістің Welt am Sonntag басылымына берген сұхбатында НАТО бас хатшысы Йенс Столтенберг осылай деп мәлімдеді.
Столтенбергтің айтуынша, Кремль өз шабуылын ақтау үшін Украинадағы "биологиялық қару шығаратын зертханаларға" көптің назарын аудартып отыр.
"Енді осындай жалған мәлімдемелер жасалғаннан кейін біз өте сақ болуға тиіспіз, себебі осы жалған тұжырымды пайдалана отырып, Ресейдің өзі химиялық қару қолданатын операциясын жоспарлап жатқан болуы мүмкін" деді НАТО бас хатшысы.
Егер Ресей химиялық шабуыл жасаса, онда бұл әскери қылмыс болады деді ол.
Осыған дейін Ресей сыртқы істер министрлігі Украина Ресей шекарасына жақын жерде арнайы биозертханаларда биологиялық қарудың компоненттерін дайындады деп мәлімдеген.
Оқи отырыңыз: Ресей "Украина славяндарды жоятын биоқару жасамақ болды" дейді. Бұл ғылыми тұрғыда мүмкін бе?
ПІКІРЛЕР