АҚШ Конгресі Ресей мұнайын импорттауға тыйым салатын заң жобасын әзірледі
АҚШ-тың бір топ заң шығарушысы Ресей және Беларусьпен "тұрақты және қалыпты сауда қатынастарын үзу туралы" заң жобасын әзірлегенін мәлімдеді.
"Ресейден энергетикалық тауар импорттауға тыйым салатын және Ресей, Беларусьпен сауда қатынастарын тоқтататын заң жобасын ұсындық" деді олар мәлімдемесінде.
Конгрестегі Республикалық партия мен Демократиялық партия жетекшілері қолдаған заң жобасы таяу арада қаралады, мақұлданса АҚШ президенті Джо Байденге жіберіледі. Джо Байден бұған дейін АҚШ-та жанар-жағар май қымбаттап кетуі мүмкін деген қауіппен бұл жөнінде пікірін ашық айтпаған. АҚШ пайдаланатын мұнайдың 7 пайыздайын Ресейден импорттайды. Алайда жексенбіде АҚШ мемлекеттік хатшысы Энтони Блинкен Ақ үйдің Ресей мұнайын импорттауға тыйым салу мүмкіндігін қарастыратынын айтқан.
Ресей және Беларусьпен "қалыпты сауда қатынасы" үзілсе, бұл екі елдің тауарларының импорт алымы 30 пайызға дейін өседі. Қазір ол 3 пайыз ғана. Ресейдің АҚШ-қа негізгі экспорты – мұнай, металл, платина мен тыңайтқыш.
АҚШ бұл шараны Ресейдің Украинаға басқыншылығына жауап шараның бірі деп есептейді.
Гаагада БҰҰ халықаралық соты Украинаның Ресейге қарсы арызын қарай бастады
Гаагадағы Біріккен ұлттар ұйымының халықаралық соты Украинаның Ресей үстінен түсірген талап арызын дүйсенбі күні қарай бастады. Киев Мәскеуді геноцид туралы халықаралық конвенцияны теріс түсінеді деп айыптайды. Талап арызда Ресей конвенцияны теріс мақсатта пайдаланып, Украина жеріне басып кіруге ілік етті дейді.
Ресей президенті Владимир Путин Украинаның Донбасында 2014 жылдан қазіргі дейінгі жағдайын сөз еткенде "геноцид" деген терминді бірнеше рет қолданған. Киев соттан талап арызын қанағаттандыруды, Ресей басқыншылығын тоқтатуды талап етіп отыр.
Халықаралық соттың дүйсенбідегі отырысына Ресей өкілі келмеген. Мұны судья Джоан Донохью сот ашылған кезде айтты. Сот отырысынан онлайн трансляция болды. Украина өкілі Антон Кориневич соғыс алдында Мәскеудің Киевке геноцид жөнінде таққан айыбы негізсіз екенін дәлелдейтінін мәлімдеді.
Украинадағы соғыс. 7 наурызда не болды? Қысқа-нұсқа шолып шықтық:
- Ресейлік әскерилер 7 наурыз таңертең Николаев қаласын атқылай бастаған. Киев те де жарылыс дауыстары естілді. Түнде Харьков пен Одесса облысында атыс болғаны хабарланды. Ресей қорғаныс министрлігі Харьковтағы физика-техникалық институтының реакторын жаруды жоспарлаймыз деді.
- Ресей мен Украина арасындағы келіссөздің үшінші раунды өтті. Келіссөзге қатысқан Украина делегациясының өкілі Михаил Подоляк "келіссөзде жағдайда түбегейлі өзгертетін нәтижеге әлі қол жеткізген жоқпыз" деді. Екі тараптың талқысы алдағы күндері жалғаспақ.
- БҰҰ Адам құқығы жөніндегі басқармасы: Соғыс басталғалы Украинада кемі 406 бейбіт тұрғын қаза болды, оның ішінде 27 бала бар. Кемі 801 бейбіт тұрғын жараланды.
- Украинаның бас штабы Ресей 11 мыңнан аса әскериінен айырылды дейді. Ресей билігі 2 наурызда 498 әскериінен айырылғанынын, 1597 солдаты жараланғанын айтқан. Сол кезде Украина тарабы Ресейдің бес мыңға жуық әскерін өлтірдік деген еді. Мәскеу 2 наурыздан соң әскери шығыны жайлы ешқандай хабар таратпады.
- Ресей әскерилері Мелитополь қаласындағы телемұнараны және радиобайланыс мұнарасын басып алды.
- Украина президенті Зеленский Ресейді бейбіт тұрғындарды өлтірді деп айыптады. Бұған дейін Ирпень қаласында эвакуация кезінде жас отбасының бірнеше адамы қаза тапқан еді.
- Украина қорғаныс министрлігі Чугуев қаласын қайтарып алғанын мәлімдеді.
- БҰҰ халықаралық соты Украинаның Ресейге қарсы түсірген шағымын қарай бастады.
- Украинадағы Николаев облысы әкімшілігінің басшысы Виталий Ким Николаев қаласындағы әуежай Украинаның бақылауына өтті деп мәлімдеді.
- Ресей сыртқы істер министрі Сергей Лавров пен Украина сыртқы істер министрі Дмитрий Кулеба 10 наурызда Түркияның Анталия қаласында кездеседі деп жоспарланған.
Cоғыс уақытында кейбір ақпараттарды тәуелсіз дереккөздер арқылы тексеру мүмкін емес.
Беларусьте Украина мен Ресей арасындағы келіссөздің үшінші кезеңі аяқталды.
Келіссөзге қатысқан Украина делегациясының өкілі Михаил Подоляк "келіссөзде жағдайда түбегейлі өзгертетін нәтижеге әлі қол жеткізген жоқпыз" деді.
Оның сөзінше, атысты тоқтатып, келісімге келу үшін кеңесу мен келіссөз әлі жалғасады.
ПІКІРЛЕР