"Москва" ракеталық кемесі батып кетті
Ресейдің "Москва" ракеталық крейсері порттағы тұрағына келген сәтте батып кетті. Бұл туралы Ресейдің қорғаныс министрлігі хабарлады. Министрлік кеме теңіздегі дауылдан тепе-теңдік сақтай алмады деп отыр.
Ресей теңіз әскерінің флагманы саналатын "Москва" кемесі кеше, 13 сәуірде өртенген еді. Ресей тарабы ракеталық крейсерде алдымен өрт шығып, қару-жарақ қоры жарылып, кеме қатты зақымданғанын айтқан. Ведомоства экипаж толық эвакуацияланған хабарлаған, бірақ өрттің неден шыққанын айтпаған еді. Зардап шеккендер бар-жоғы белгісіз.
Ал Украина билігі украиналық кемелерге қарсы "Нептун" ракетасынан "Москва" крейсеріне шабуыл жасалғанын, кеме қатты зақымданғанын айтқан.
"Москва" крейсері 1976 жылы пайдалануға берілген, Ресей әскерінің Қара теңіздегі ең негізгі кемесі еді. Украина басылымдарының хабарлауынша, "Москва" крейсері Одесса облысы Змеиный аралына шабуылға қатысқан.
Жоғарғы Рада Ресейдің Украинадағы әрекетін геноцид деп таныды
Украина Жоғарғы Радасы Ресей армиясы мен Ресейдің саяси және әскери басшылығының Украина халқына жасаған әрекетін геноцид деп танитын жарлық қабылдады. Бұл туралы Рада сайты хабарлады.
Құжатты депутаттардың 363-і қолдап дауыс берді.
"Ресей қарулы күштерінің әрекеті қылмыстық агрессия ғана емес, оның мақсаты - украин халқын жою" деп жазылған жарлық түсіндірмесінде.
Құжатта Рада депутаттарының үндеуі БҰҰ, Еуропа кеңесінің парламенттік ассамблеясы, Еуропарламент, ЕҚЫҰ және НАТО ұйымдарына, сонымен бірге мемлекеттердің үкіметтері мен парламенттеріне жолданатыны айтылған. Рада олардан Ресей әскерінің Украинадағы әрекетін украин халқына жасалған геноцид деп тануын сұрайды.
Бұған қоса, Украина парламенті Z және V белгілеріне тыйым салу туралы жарлық қабылдады. Оларды киімге, әлеуметтік желіге, БАҚ-қа, жарнамаға, қоғамдық орындарда жазуға болмайды.
Буча қырғынынан кейін Ресейге Украина халқына геноцид жасады деген айыптар тағыла бастаған. Бірнеше апта Ресей әскерінің бақылауында болған Буча қаласында орыс әскері кеткеннен кейін бейбіт тұрғындардың мәйіттері табылған. Соңғы мәлімет бойынша қаладан 403 мәйіт табылған. Олар Ресей әскерінің қолынан қаза табуы мүмкін.
БҰҰ мәліметінше, күн сайын Украинаға 30 мың адам оралып жатыр. Олар соғысқа байланысты басқа елге кетуге мәжбүр болған. Қазірге дейін 870 мың украин босқыны оралған.
Apple Ресейге қарсы санкциялардың аясында ресейлік "Альфа-банктің" мобильді қосымшасын App Store дүкенінен алып тастады. Енді бұл қосымша айфонға жүктелмейді. Қосымша әзірге Google Play дүкенінде бар. Осыған дейін App Store мен Google Play дүкендерінен "Сбербанк" қосымшасын өшіріп тастаған.
ПІКІРЛЕР