2011 жылғы желтоқсанның 16-сында Маңғыстау облысындағы Жаңаөзен қаласында полиция бірнеше ай бойы ереуілдеп тұрған мұнайшыларға қарсы оқ жаудырып, күшпен таратқан. Ресми есеп бойынша, Жаңаөзен оқиғасы кезінде Жаңаөзен қаласы мен Шетпе станциясында болған ереуіл мен толқу кезінде 17 адам қаза тауып, жүзден астам адам жараланған.
"Жаппай тәртіпсіздік ұйымдастырды" деген айып бойынша 37 адам сотқа тартылып, оның үшеуі толық ақталып шықты. 21 адам шартты түрде, ал 13 адам үш жылдан алты жылға дейін сотталған болатын. Кейін Қазақстан үкіметі жараланғандарға 500 мың теңге, ал оққа ұшқандардың отбасына бір миллион теңге өтемақы төлеген еді. Кейбір оқ тигендер арасында бұл ақшаны алмағандар да бар.
Оқи отырыңыз: Жаңаөзен оқиғасы бойынша барлық мақалалар
Жаңаөзен оқиғасынан соң мұнайшылар және "қызметін асыра пайдаланғаны үшін" жазаға тартылған кіші шенді полиция қызметкерлерімен қатар бірқатар қоғам белсенділері, саясаткерлердің үстінен қылмыстық іс қозғалып, түрмеге қамалды.
Жаңаөзендегі орталық алаңның 2011 жылғы және 2012 жылғы көріністері
Қазір қайғылы оқиға қоғамның есінде ме? Жаппай тәртіпсіздік пен оқ атуға тікелей кінәлілер жазасын алды ма? Құрылған қоғамдық комиссиялар мен зерттеулердің нәтижесі қандай? Осы және өзге де сауалдарға Жаңаөзен оқиғасы бойынша құрылған Қоғамдық комиссия жетекшісі, саясаткер Рысбек Сәрсенбайұлы жауап берді.
Сұрақтарды Азаттық сайты мен әлеуметтік желідегі парақшаларымызға жолдауларыңызға болады.