Қазақстанның сыртқы істер министрлігі Азат Еуропа/Азаттық радиосының жеті журналисіне (Чехия, Ресей, Қырғызстан) Қазақстандағы кезектен тыс президент сайлауынан ақпарат таратуға рұқсат бермеді. Сыртқы істер министрлігінің баспасөз хатшысы Айбек Смадияров сайлауға бір күн қалғанда, маусымның 8-і күні Азат Еуропа/Азаттық радиосы тілшілеріне аккредитация берілмейтінін хабарлады. Министрлік рұқсат бермеуінің себебін түсіндірген жоқ.
Сайлау бюллетенінде жеті кандидаттың аты-жөні көрсетілген:
- Жамбыл Ахметбеков - "Қазақстан комунистік халық партиясы",
- Дания Еспаева - "Ақ жол" партиясы,
- Әміржан Қосанов - "Ұлт тағдыры" қозғалысы,
- Төлеутай Рахымбеков - "Ауыл" партиясы,
- Амангелді Таспихов - Қазақстан кәсіподақтар федерациясы,
- Қасым-Жомарт Тоқаев - "Нұр Отан" партиясы,
- Сәді-Бек Түгел - "Ұлы дала қырандары" республикалық қозғалысы.
Азаттықтың Шымкенттегі тілшісі дауыс беру жәшігінде қатарынан бес бюллетеннің бірге бүктеліп жатқанын көрді. Бұл оқиға 9 маусымда таңертеңгі сағат 7 жарым шамасында қаладағы №152-ші сайлау учаскесінде болды. Алайда сайлау учаскесінің төрайымы Азаттық тілшісіне әуелі "бір отбасыдан салған шығар" дегенімен кейін бұл оқиғаны мүлде жоққа шығарды.
Азаттық тілшісі Асылхан Мамашұлы Алматыдағы Алғабас ықшам ауданындағы №528 сайлау учаскесінде бір азаматтың сайлау жәшігіне екі бюллетеньді қатар салғанына куә болды (видеосы бар).
"Сайлаушы "қызым үшін де дауыс бердім" деді. Бақылаушылардың бірі растады. "Нұр Отан" партиясының бақылаушысы "көрмедім" деп айтты. Сайлау учаскесінің төрайымы екі бюллетень бір-біріне жабысып қалған болар деп жауап берді" деді Асылхан Мамашұлы.
ПІКІРЛЕР