Алматы мен Астана әкімдері өз есептерінде көп балалы аналар мәселесін ерекше атап айтты. Астанада 4 ақпанға қараған түні бес бала қаза тапқан өрттен соң Қазақстанның бірнеше аймағында басталған көп балалы аналар наразылығынан кейін үкімет жанынан халықтың тұрмысын жақсарту мақсатында құрылған арнайы жұмыс тобын вице-премьер Ерболат Досаев басқарады.
Әкімдердің есеп беруін сынап жатқандар да бар. Саясаттанушы Досым Сәтпаев мұны "Қазақстандағы көп жалған нәрселер тәрізді кезекті алдамшы көрініс" деп атаған.
"Әкімдер әділ әрі балама сайлау жолымен сайланбайынша, олар азаматтардың емес, үнемі президенттің алдында ғана есеп беретін болады. Және жіберген қателіктері үшін халықтан емес, содан (президенттен – ред.) кешірім сұрайды. Бізде тіпті жемқорлығы үшін сотталған шенеуніктер де өздері тонаған қазақстандықтардан емес, үнемі президенттен ғана кешірім сұрайды" дейді саясаттанушы.
Астанадағы есеп беру жиынында қала әкімі Бақыт Сұлтанов өрттен бес баласы қаза тапқан отбасына көңіл айтып, "бұл жағдай елде қордаланып қалған әлеуметтік мәселелерді көрсетті" деді.
- Осы бір оқиға көп балалы аналар мәселесімен бірге басқа да қордаланған әлеуметтік проблемалардың барын көрсетті. Қауіпсіздік тұрғысында жедел шешуіміз керек түйіткілдер барын жасырмаймыз. Басты міндетіміз - осы кедергілерді жою және мұндай қайғылы жағдайлардың қайталануына жол бермеу, - деді Сұлтанов.
Ол қазіргі кезде баспанаға мұқтаж тұрғындардың мәселесін шешу жолдары қарастырылып жатқанын хабарлады.
- Көп балалы аналарды жалдамалы пәтермен қамтуды қарастырып жатырмыз. Баспананы жалға беріп қана қоймай, кейін сатып алатындай етпекпіз. Яғни, қаржы жалға берген адамның қалтасына емес, пәтерді сатып алуға жинала береді, - деді әкім.
Әкім Бақыт Сұлтановтың есебін тыңдауға келген Астана тұрғындары қалада кей бағыттарда жолаушы тасымалдайтын автобустардың ескіргенін, қаланы үнемі қою түтін басып тұратынын, көмір мен жанармай бағасының қымбат екендігін айтып, үлескерлер мәселесін қозғады. Астана әкімі көп мәселелер шешіліп жатыр деп мәлімдеп, өзге мәселелер де шешімін табады деп сендірді.
ПІКІРЛЕР