Украинадағы елші Дархан Қалетаев: Қазақстан азаматтары мінген алғашқы ұшақ бүгін түнде Польшадан ұшып шығып, Алматыға таңғы алтыда келеді
Қазақстанның Украинадағы төтенше және өкілетті елшісі Дархан Қалетаевтың айтуынша, кемі 150 адам жеткізіледі. Эвакуацияға келісіп, елге кетеп деп өтініш бергендер саны қазір 500 адамнан асқан. Жалпы Украинадағы 1700-ге жуық Қазақстан азаматы бар.
– Львовта, 100-ге жақын адам сонда. Қазір жолда, Киевтан таңертең бір колонна жібердік, 100-ге жақын адам кетіп барады. Сосын жаңа екі микроавтобус жібердік, тағы 40 адамдай. Сонымен жолда тағы 200 адам бара жатыр, амандық болса барады. Біз өзімізде тұрып қалғанымыз, біз жасыл коридорды күттік, Польшаға. Бізде ана шенген виза жоқ қой, біздің азамттарда. Содан кейін жасыл коридорды күттік та, біздің ана Польшадағы елші азамат бәрін жасады, бірақ біршама уақыт кетіп қалды. Содан кейін кешке жақын біз келісім алдық, – деді Қалетаев Азаттыққа.
Түркия президенті Режеп Ердоған 25 ақпанда НАТО саммитінде солтүстікатлантикалық одақ "батылырақ әрекет етуі тиіс, әзірге Батыс Украинаға тек ақыл-кеңесімен ғана көмектесіп жатыр" деп мәлімдеді.
Қытай мемлекеттік ақпарат құралы: Си Цзиньпин Путинге Қытай Ресейдің Украина шиеленісін диалог арқылы шешу талпынысын қолдайды деді
Қытай президенті Си Цзиньпин Ресей президенті Владимир Путинмен әңгімесінде Қытай Ресейдің Украина шиеленісін диалог арқылы шешу талпынысын қолдайды деп мәлімдеді. Бұл туралы Қытайдың мемлекеттік CCTV телеарнасы хабарлады.
Екі ел басшысы жұма, 25 ақпан күні телефонмен сөйлесті.
Reuters
Зеленский Путинді келіссөзге шақырды
Украина президенті Владимир Зеленский мәлімдеме жасап, Ресей басшысы Путинді келіссөз үстеліне шақырды. Украина басшысы Путинді осымен екінші рет келіссөзге шақырып отыр.
"Ресей президентіне тағы қайырылғым келеді. Украинаның бүкіл аумағында шайқастар жүріп жатыр. Қантөгісті тоқтату үшін келіссөз үстеліне отырайық" деді Украина басшысы.
Зеленский сонымен бірге Еуропаны Украинаға белсене көмектесуге үндеді.
"Бізге осылайша самарқау көмектессеңіздер, өздеріңді қалай қорғайсыздар?" деді Зеленский.
Ол Ресейдің Украинадағы әскери қимылын Еуропаға шабуыл деп атап, Еуропа елдері оған белсене төтеп беруі тиіс деді.
"Ресейдің Украинаға басып кіруі – жәй ғана басып кіру емес, бұл Еуропаға соғыстың басы. Еуропа бірлігіне қарсы, Еуропадағы қарапайым азаматтардың құқықтарына қарсы, құрлықтағы барлық ережелерге қарсы қадам. Еуропа елдерінің шекараны күшпен белгілеуден бас тартуына қарсы жасалған қадам" деді Зеленский.
ПІКІРЛЕР