Астанада студенттер елшілік алдында Украинаны қолдау акциясын өткізді
25 ақпанда Украинаның Нұр-Сұлтандағы елшілігі алдына кемінде 20 студент жиналып, Украина азаматтарына қолдау білдірді. Олар Ресейдің көрші елге агрессиясын айыптап, соғысты доғаруды талап етті. Жиналғандардың басым бөлігі – Назарбаев университетінің студенттері.
– Біз соғысты тоқтатуды талап етіп отырмыз. Тарихтан не болғанын білеміз: Грузиядағы соғыс, Абхазиядағы қақтығыс. Қырым. Енді 2022 жылы Украинаның тұтастығына нұқсан келіп отыр. Менің ойымша, тәуелсіз Украинадан Ресей әскерін шығаруы тиіс. Бұл соғысты қолдамаймыз, келіспейміз. Украина өз болашағын өзі таңдауы тиіс, – деді Бейімбет Молдағали.
Жиналғандардың қолында "Путин, соғысты тоқтат!", "Бізге соғыс емес, бейбітшілік керек" деген жазуы бар плакаттар болды. Олар елшілік алдында "Соғыс тоқтатылсын!", "Украина жасасын!" деп айқайлады.
Сәлден соң Украинаның Қазақстандағы елшісі Петр Врублевский шығып, студенттерге қолдау көрсеткені үшін алғыс білдірді.
Оқиға орнына полиция қызметкерлері келді. Олар студенттерге "автобусқа отырыңдар, үйлеріңе жеткізіп салайық" деген ұсыныс жасап, тезірек таратып жіберуге тырысты. Ал студенттер оған келіспеді.
Жиналғандар елшілік алдындағы тақтаға плакаттарын іліп, гүлдерін қойып, сәлден соң тарасты.
Акцияға қатысушылардың бірі сәлден соң Азаттыққа хабарласып, полицейлердің оларды жолда тоқтатып, газельге кіргізгенін, құжаттарын тексеріп, өздері туралы мәліметті жазып алғанын айтты. Бұдан соң студенттерді босатып жіберген.
Украина әскері Киевті қорғау үшін қалаға кірді
Бұл туралы Украинаның өз ақпарат құралдары мен Батыс телеарналары хабарлады. Бұл ақпаратты Украина ішкі істер министрінің кеңесшісі Вадим Денисенко растады.
Ол қала тұрғындарынан әскери техниканың қозғалысын фото-видеоға түсірмеуге, әлеуметтік желіде таратпауға шақырды.
Денисенконың сөзінше, Киевте жаумен күресуге ерік білдіргендерге 18 мың автомат таратылған.
Рада депутаттары Украинаның Ахтырка қаласындағы балабақшаны атқылаудан қанша адам қаза тапқанын айтты
Украина Жоғарғы радасының депутаты Федор Вениславскийдің хабарлауынша, Ахтырка қаласындағы балабақша ғимаратына Ресей зымыраны түсіп, салдарынан 3 адам қаза тапқан, 17 адам жарақат алған. Арасында балалар да бар.
Депутат "Рада" телеарнасына екі баланың ауыр жағдайда екенін айтты. Бұл ақпаратты өзге дереккөздер арқылы растау мүмкін болмады.
Ахтыркадағы балабақшаға шабуыл туралы мұның алдында Сумы облысы әкімшілігінің басшысы хабарлаған.
Азаттықтың Орыс қызметі балабақшаға шабуылдың салдары деген суреттерді тексере алды. Бұл – Лесной тұйық көшесіндегі "Солнышко" балабақшасы. Украина билігінің айтуынша, балабақшаға "Ураган" дейтін зымыран жүйесінен шабуыл жасалған.
Украина сыртқы істер министрі Дмитрий Кулеба бұл оқиғаны "әскери қылмыс" деп атап, Украина билігінің қажет материалдарды Гаага халықаралық трибуналына беретінін мәлімдеді.
Фото. Киев жұрты метрода бас сауғалады
Ресей әскері Киевке кірген тұста жұрт қаладағы метро кешендеріне бас сауғалап жатыр. Киев метросының кейбір станциялары әлемдегі ең терең бекеттердің қатарында. Олардың тереңдігі 100 метрден асады.
Киев жұрты метрода бас сауғалады
ПІКІРЛЕР